NA VEIVUKEI KEI NA VEIVAKATOVOLEI (#6982)

O cei li na Dauveivakacegui e na gauna ni leqa me tautauvata kei na Kalou? Mo kaya tiko ga: Me sa vakacaucautaki duadua ga na Kalou! O Koya ga na Kalou! E da sa Nona dauveiqaravi o keda kece ga, ka da sa vakarorogo kece ga ki na Nona lewa!

-The Báb
-----------------------

NA VEIVUKEI KEI NA VEIVAKATOVOLEI (#6983)

Mo kaya tiko ga: Sa uasivi duadua na Kalou e na veika kece ga, ka sa sega tale ni dua na ka e lomalagi e cake se e na vuravura e ra me uasivi cake ia na Kalou duadua ga. Sa dina ga, sa i Koya vakataki Koya na Kilaka, na Dauveivakacegui, na kaukauwa duadua ga.

-The Báb
-----------------------

NA VEIVUKEI KEI NA VEIVAKATOVOLEI (#6984)

O i Kemuni na Turaga, na noqu Kalou ka noqu i Vakavakacegu e na noqu lomabibi! O ni sa noqu i Sasabai ka noqu i Vakavakaruru e na gauna ni leqa ka noqu i Tokani Lomani e na noqu galili! O ni sa noqu i Vakavakacegu e na noqu rarawa, ka noqu i Tokani e na noqu tiko duadua voli! O ni sa dau veivakacegui ka kauta tani na noqu leqa kece ga ka Dauvosota na noqu i valavala ca.

Au sa vakararavi vakatabakidua yani vei Kemuni, ka vakamasuti Kemuni e na utoqu kece ka vaka kina na noqu vakanananu vata kei na yamequ, me taqomaki au mai kina e na veika kece e veisaqasaqa kei na Nomuni lewa, e na tabagauna ni Nomuni veivakaduavatataki vakayalo oqo, ka Mo ni savai au mada e na veika dukadukali kece ka na vakadredretaka na noqu vakasaqara, yani, e na yalosavasava duadua ka serau, na rurugu ni vunikau ni Nomuni loloma.

Ni veivosoti mada, O i Kemuni, na Turaga, vei ira era sa malumalumu, ka vakabulai ira na tauvimate, ka vagunuvi ira tale ga na karamaca.

Ni vakamarautaka na lomadra ka dau caudre kina na Nomuni loloma ka vakaramasetaka e na i Serau ni Nomuni loloma vakalomalagi ka vaKalou tale ga.

Ni ubia mada na veivale ni Nomuni veivakaduavatataki vakayalo e na Nomuni i tutu tabu ka tokara ki uluqu na i sala ni Nomuni veitokoni.

Ni vakararamataka na mataqu e na i serau ni Nomuni cina ni veisaututaki ka vukei au me u veiqaravi e na Nomuni mata ni katuba tabu.

Ni vakavuabaletaka na utoqu e na loloma vei ira na Nomuni tamata ka qisi au me u vakatakilakila ni Nomuni loloma, me u vakaraitaki ni Nomuni dauveivukei, me u vakacerecerea na tiko veilomani e na kedra maliwa na Nomuni daulomani, me u gugumatua e na Vukumuni, ka u kaburaka tiko ga na Kemuni i vakananumi ka guilecava na noqu gagadre ia me u vakananuma vakatabakidua ga na Lomamuni.

O i Kemuni na Kalou,na noqu Kalou! Ni kakua ni tosoi au tani mai na cagi mudre ni Nomuni veivosoti kei na yalololoma, ka kakua ni tawasei au tani mai e na waivure ni Nomuni veinanumi kei na veivukei.

Ni laivi au me u vakacegu e na ruku ni Tabamuni dauveitaqomaki ka Mo ni wanonovi au sobu tale ga mai e na Matamuni sa vu ni dauveitaqomaki.

Ni vakayavalata na yamequ me u vakacaucautaka na Yacamuni e na kedra maliwa na Nomuni tamata, ka me rogo na domoqu e na veisoqo levu ka me taladrodro mai e gusuqu na uasivi ni Nomuni veivakacaucautaki.

Sa i Kemuni, e na dina taucoko, sa Dauloloma, na Lagilagi, na iGu Cecekia, na kaukauwa Duadua ga.

-`Abdu'l-Bahá
-----------------------

